احنا اللى قالو علينا دول شوية عيال سيس
ومش فالحين غير فى النت والتهيس
وشوية قالو لا دول شوية جواسيس
طلعنا يوم 25 نقول لا للرئيس
كانت مظاهرة سلمية
لقينا نظامه بيقتل فينا بالمية
لما الناس ندهت وقالت حرام فين الحرية
طلعت وقتها 50 منظمة حقوقية
تقول دى جريمة فى حق الانسانية
ردوا عليهم وقالو دول شوية نور وحرامية
ونسى ان هو ونظامه اللى سرق البلد ديا
وبعدها سحب شرطته عشان يروعنا
ونرجع نقول احنا يا ريتنا ما طلعنا
بس احنا فاجئنا هو وكل الدنيا ديا
وبسرعة شكلنا لجان شعبية
تحمينا من كلابه ومن قبلها تحمى البلد ديا
واخيرا لقناه طالع علينا بخطابه
ضحك على الناس بكلمتين معسولين وجرى قفل عليه بابه
وحتى مهنش عليه يذكر الشهيد اللى فقدوه اهله واحبابه
ومرة واحدة لقينا الناس اتعاطفت معاه
وطلعت تقول كفايه كدة كلنا وياه
وتانى يوم شفنا سماحته الانسانية
باعت علينا كلابه فى التحرير بالاحصنة كانها عربية
داخلين علينا بالسيوف والملوتوف
لكن احنا خلاص كسرنا حاجز الخوف
ميهمناش بلطجى ولا حتى قناص معاه كلاشنكوف
واخيرا طلعت التصريحات الدولية
تقولو هى دى يا ظالم الديموقراطية
طلع صرح وقال انا عايز اسيبها لان خلاص فاض بيا
بس مش هاينة عليا اسيبها وهى فى الحالة ديا
ياعم بس انت اتوكل وهى هتبقى مية مية
ويطلع لينا سليمان اللى هو عميل الامريكان
يقول المصرى ميعرفش يعنى ايه ديموقراطية
دة على اساس انه بسلامته جاى من دولة اوروبية
انا نازل يا امة ورايح الميدان
ورايح اخده بالاحضان زى العاشق الولهان
رايح هناك للحرية والكرامة والعدالة الاجتماعية
لان هناك يا امة مفيش فرق بين غنى وفقير
كله زى بعضه ابن الغفير زى ابن الوزير
ادعيلنا يا امة بالثبات حتى الممات
وادعى عليهم يا امة بالشتات
اللى طلعوا بعد الثورة وقالو هنصلح
هنغير وكفاية بقى دة اللى فات مات
انا نازل يا امة وبقولها بكل مصداقية
مش خارج من الميدان غير ومعايا الحرية
او اموت هناك واحصل اخواتى اللى استشهدوا قبليا
ها يا مصرى هتنزل معايا الميدان
ولا لسة زى منتا جبان
ها يا مصرى هتنزل معايا الميدان
ولا لسة زى منتا جبان
يوميات مصرى طهقاااااااااااااان
شعر :ابراهيم المصري
انا عارف ان القصيده كانت قبل تنحى مبارك
بس عجبتنى اووووى فجبتها
